یک برے پدا ۔۔۔مکران ءَ زانت ءِ ھلاپ ءَ ہون ءِ گوازی

آ روچ ءَ سباہ ءِ سارتیں سمین، درد ءِ مولماں کمایان، درپشوکیں روچ ءِ رُژن ءَ لُنج ءُ تہاریں سیاہ شپ ءَ بدل کنان، جگر دریں ھالءَ سرجمیں بلوچ ڈیھ ءَ سرکنان اَت۔ ہمک بلوچ کہ زانتی آ شوپ ءَ تلوسیت، پہ آ ئی ءَ اے روچ قیامت ءَ کم نہ اَت۔ چہ ہما روچ ءَ کسانُکیں مہلب ودار ءَ نشتگ۔ مرچی ماہے ءَ گیش اِنت کہ اے دو سالی گونڈو ،وتی لوگ ءِ دروازگ ءِ دیم ءَ چاریت ءُ ہمک ساھگ ءَ وتی پِت ءِ ساھگ لیکیت ءُ بلے بژن کہ ہمک رند ءَ آ رد کپیت، آ یوکیں ہمک مردم ، ءُ ظاہریں ہمک ساھگ آئی پِت ءِ نہ بیت۔

کسانُکیں مہلب اے نہ زانت کہ آ ہونریچیں دیھانی دست ءَ چورو کنگ بیتگءُ آ ئی پِت نی انچیں جاہے ءَ سر اِنت کہ آ ئی واتر بئیگ وابانی تہ ءَ ھم راست بیت نہ کنَت۔ مہلب بلوچستان ءِ زانکاریں استاد ءُ علم دوست زاہد سکانی ءِ زہگ اِنت ۔اے ہما راج دوست اِنت کہ 4 دسمبر2014 ءَ پورٹ ءِ شَہر ءَ وتی جوڑ کُتگیں وانگ جاہ ءِ دیم ءَ سلاہ بندیں سینکل سوارانی دست ءَ تیر گواری ءِ سؤب ءَ جنَگ بیتگ ۔ زاہد آسکانی ءَ وتی پُشت ءَ وتی کہول ءَ ھوار چار وانگ جاہ گوادرشہَر ءُ ایشی کش ءُ گوْر اںیلہ داتگ ۔

زاہد آ سکانی بن در ءَ چہ پنجگور ءِ د مگ پروم ءَ 1999 ءِ دور ءَ گوادر ءَ اتکگ ءُ 2002ءَ ’’دی اوئیسس اسکول‘‘ ءِ اوّلی کیمپس ءِ بن ہِشتے ایر کُتگ۔گوادر ءِ تہ ءَ انگلش میڈیم وانگ جاہ ءِ واب ءَ راستں دروشم دیگ ءِ جُہد ءَ آ ئی گوں لہتیں نودربراں بندات کُت ءُ مرچی گوادر ءِ تہ ءَ ہزارانی کساس ءَ آئی نودربر درکئیت۔ مرچی آ ئی نودربر گوں سوبندی ءَ امریکی وانگ جاہاں سر بئیگءَ ابید وتی جند ءِ وانگ جاہانی کار مستر انت۔ علم ءِ رُژن ءَ چہ وانگ جاہ ءَ تالان کنگ ءَ ابید آ ئی جُہد پہ بلوچی لبزانک ءَ ھم ستا کرزاَنت۔ماں بلوچیءَ نبشہ کنگ ءَ ابید آ ئی ءَ انگریزی کتاب ماں بلوچی ءَ رُجانک ھم کُتگ۔آ ئی وانگ جاہ گوادر ءِ ہما اوّلی وانگ جاہ بیتگ کہ اُد ءَ بلوچی زُبان ھم وانینگ بیتگ۔گوادر ءِ جامنندانی رِد ءَ اے پیمیں راجی مڈی ءِ کوش دگہ علم دوستاں دلپروش کنگ ءُ مکران ءِ زانتی آ شوب ءَ دارگ ءِ مزنیں پندلے ۔ زانگ بہ بیت کہ چہ کوئٹہ ءَ رَند مکران بلوچستان ءِ ہما ہلک اِنت کہ اِدا زانتکاریں ورناہانی کچَ گیش ءَ چہ گیش بیان اِنت ۔ ایشی مستریں سبب ایش اِنت اِدے زانتکاریں ورناہاں وَتی کُمک ءَ چہ وَت انچیں وانگ جاہ جوڑ کُتگ کہ چہ اُدے وانگ ءَ نودربر نہ تہنا نبشتہ کنگ ءُ وانگ سکھ اَنت بلکیں آ انچیں ہُنر ھم ہیل گِراَنت کہ آ مرچگیں تُرند گامیں دُنیا ءَ یک زانتکاریں مردمے ءِ تہ ءَ الّم ءَ بہ بنت۔ پہ زانت ءَ چُشیں گام زیروکانی تہ ءَ چہ دراہاں پیش پنجگورءِ زاہر حُسین ءِ نام کئیت کہ 1993ءَ مکران گوں نوکیں دور ءِ وانگ ءُ زانگ ءَ ہمگرنچے کُتگ، پدا تُربت ءِ زاہد حُسین ءُ برکت اسمائیل ءِ وڑیں ورناہانی نام کاینَت ءُ آ سر ءَ گوادر ءِ تہ ءَ زاہد آسکانی ءُ دگہ زانت دوستانی نام کاینَت کہ آ ہاں بندات چہ وتی کُمک ءَ کُتگ ۔

انچو کہ زانتی دیمروئی ہمک راج ءَ چہ آ ئی حق ءُ ذمہ واریءَ زانتکار کنَت ءُ روچے نہ روچے ہمیں زانت آ راج ءِ ڈالچاریں گل زمین ءَ چہ بزّگ ءُ واری ءَ کشیتءُ معاشی ءُ چاگردی دیمرئی ءَ رہادگ کنت۔بلے باز براں چوش ھم بیت کہ ایشی ءَ چہ پیسر کہ آ راج دیما در بیئت ، لہتیں چیر دستیں گَل وتی لانکاں پہ آ راج ءِ بیگوہی ءُ پدا پُشت ءَ تیلانک دئیگ ءَ بنداَنت۔

مکران کہ پہ زانتی دیمرئی ءَ دیم ءَ جُنزان اَت ءُ زاہد آسکانی ءُ دگہ راج دوستاں کہ ہمک تُپان ءُ آر ءِ دیمپانی کنان وتی گراں نہادیں وھد ءُ ہذمت ندر کنان گوں مُہکمیں ارادہاں وتی کمردانی بستگ اِ تنت گڑاہمیں چیر دستیں گَلاں زانت ءِ رُژن ءَ دارگ ءُ نودربرءُ علم دوستانی دِل ءَ آ س ماندارگ ءِ ھاتر ءَ بلوچ پُسگان ءَ چہ زانت ءَ زِبہر کنگ ءَ وتی وس ءُ واک ءِ ہمک جُہد کُنان ، مرچی نہ تہناکساں سالیں مہلب بلکیں سرجمیں بلوچ راج ءَ را چورو ءُ پُرسیگ کت۔ 

انیگیں وھد ءَ مکران ءِ تہ ءَ ڈسٹرکٹ کیچ زانت ءِ رِدا چہ پنجگور ءُ گوادر ءَ دیما اِنت ہمیں سؤب ءَ علم دژمنی ءِ بُنگیج ھم چہ کیچ ءَ کنگ بیت، ہما وھد ءَ کہ اُد ءِ نامداریں انگلش زُبان ءِ وانگ جاہ’’ ڈِلٹا‘‘بنَد کنگ بیت ،ہمیں بہُتام ءَ گوں کہ وانگ جاہ ءِ تہ ءَ پہ نودربراں ڈیھ دژمنیں لبزانکی وانگی موجود اِنت ۔

ہمیں پیم ءَ علم دژمنی ءِ دومی بہَر اپریل ءِ ماہ ءَ چہ پنجگور ءَ بنا بیت وھدے کہ دراہیں پرائیویٹ وانگ جاہان ءَ نشانگ جوڑ کنان آ ہان ءَ انچیں مذہبی گَلانی نیمگ ءَ چہ بند کنگ ءِ جار پرینگ بیت کہ چدوپیسر کس ءَ آ ئی بارو ءَ نہ ھُشکتگ۔ سرجمیں پنجگور ءِ پرائیویت وانگ جاہ تاں بازیں ماہاں بند کنگ بیت اَنت ، اے پیم ءَ نودربرانی وانگ ءُ زانگ ءَ مزنیں تاوانے دئیگ بیت۔

دیمتر ءَ گوں بلوچ راج دپتر ءَ سُہر کنان علم دژمنی ءِ سہمی بہر ءَ سرجمیں بلوچستان چہ زانتءِ سر چمّگے ءَ زبہر کُت۔ زاہد آسکانی کوش پہ سرجمیں بلوچ راج ءَ یک مزنیں تاوانے بئیگ ءَ ھواربلوچ راج ءِ دیمرئی ءِ ھلاپ ءَ یک انچیں پندلے کہ ہمشی ءِ سؤب ءَ بازیں ہنر مند ءُ زانتکاریں بلوچ ورناہ پیسر ءَ ھم نشانگ جوڑ کنگ بیتگ اَنت۔ تاں بازیں روچاں ’’دی اوئیسس اسکول‘‘ ءُ گوادر ءِ دگہ نودربر، اُستاد ءُ سیول سوسائیٹی ءِ باسکاں زارشانی کُت، روانک کشت بلے پدا ھم ضلعی قانون برجا داروکیں ادارہ ءُ بلوچستان ءِ صوبائی سرکار ءِ گوش ءَ مورے ھم نہ وارت۔ 

سیاسی ءُ چاگردی جیڑہ ءُ جنجالانی میان ءَ بلوچستان ءَ وانگ ءُ زانگ ءِ ھلاپ ءَ پندل گیش ءَ چہ گیش بیان اَنت۔ اے صوبہ پیسر ءَ چہ زانت ءِ پڑ ءِ پُشت ءَ چگَل دئیگ بیتگءُ ایشی زانتی کچ 26.6%بئیگ ءَ گوں انچُش اِنت کہ سد سالانی تہ ءَ ھم پہ زانت ءَ گشینتگیں ھواریں راجانی گل ءِ ملینیم مولءُ مرادانی مقابلہ ءَ کُت نہ کنت۔مرچی چہ دراہیں دوراں گیش بلوچستان ءِ زانت ءِ پِڑ چہ سرکار ءَ دلگوش ءِ حقدار اِنت بلے بژن کہ اے نیمگ ءَ بلوچ ڈیھ وتی تاسپیں بچانی پُرس ءِ آ س ءَ بِریان اِنت ءُ دومی نیام ءَ بلوچستان ءِ وزیر ء اعلی بلوچ ڈیھ ءِ وسائلانی بہا ءُ زیر ءَ وتی کیسگاں چہ زر ءَ چکار کنگ ءِ رَندءَ کپتگ۔ مکران ءِ بزّگیں مہلوک ءَ اُمیت کُتگ کہ بلکیں آ ہانی مردمے اگاں سرکار ءَ بئیت گڑا مکران ءِ جاور کمے گہتر بئینت بلے پدا ہزار بژن کہ مکران ءِ استیں جاور چہ دراہیں دوراں گنتر اَنت۔ 

مرچی اے صوبہ ءِ جاور انسانی حقانی گل ءُ چہ ملکی ءُ درملکی رسانک در ءَ ہمیں جُست ءَ کن اَنت کہ زانا اے ہلک ءِ بنی آ دماں ہچ ارزشت نیست؟وھدے سوات ءَ ملالہ ءِ سر ءَ ناکامیں وئیلے ءَ نشانگ جوڑ کنگ بیتء وھدے پشاور ءَ وانگ جاہ ءِ سر ءَ اُرش کنگ بیت، گڑادُنیا سر ءَ زیرگ بیت بلے وھدے بلوچستان ءَ ہزارانی کساس ءَ نودربرانی چمّانی پچ کنوک بے دردی ءَ شہید کنگ بیت،وھدے پنجگوار ءَ جنکوانی وانگ ءِ ھلاپ ءَ چیریں گَلانی نیام ءَ چِست ءُ ایر کنگ بیت،وھدے سدانی کساس ءَ بلوچ ورناہ بے گور ءُ کفن ءَ ماں زمین ءَ کَل کنگ بنَت، وھدے تا سالاں سال بلوچ پِت، مات ،گوہار ءُ برات پہ وتی گاریں مردماں ہائی کورٹ ءُ سپریم کورٹانی دیم ءَ ننِد اَنت،وھدے بلوچ چہ کوئٹہ ءَ اسلام آباد مارچ کن اَنتء وھدے ہمک روچ یک بلوچ کُہولے پہ وتی ورناہیں بچ ءِ بیگوہی ءُ بے رحمیں کوش ءَ پِریات کنَت گڑا ہمیں میڈیا ءُ ہمیں انسانی حقانی گل چماں کور ءُ گوشاں کَر بَنت۔ بائید ایش اَت کہ چہ درملکی انسانی گلانی نیام ءَ اے چیڑہ چست کنگ بیت اِنت۔ اگاں مرچی در مُلکی رسانگ در ءُ صوبائی سرکار وتی حاموشی ءَ ھلاس نہ کن اَنت ءُ اے جیڑہانی گیش ءُ گیوار ءَ دیم ءَ در نہ یاینت گڑاالّم ءَ مئے بزّگیں مہلوک ءَ دیمتر ءَ پہ مستریں آ رانی دیمپانی ءَ ساڑی بئیگ لوٹیت