گوادر پورٹ ءُ سی پیک ءِ نیامجین ءَ مہلوک ءِ بزّگی

دُنیا ءِ جُہلتریں پورٹاں چہ یکے گوادر ءِ پورٹ ءُ سی پیک اے ہلک ءِ باندات ءِ باروا بازیں چیزے گُشگ ءَ 

ابیدباندا روچ سرجمیں بلوچستان ءِ مہلوک ءِ بحت ءُ نصیب ءِ فیصلہءَ کننت۔

پانزدہ سال پیش 22مارچ 2002ءَ،وھدے کہ جنرل مشرف گوادر پورٹ ءِ بندات ءَ کنَت گُڑا یک نیمگے گوْستگیں تجربگ مہلوک ءِ چمّانی دیم ءَ آدینک ءِ پیم ءَ درابنت کہ پیش ءَ ھم بلوچستان ءِ وسائل ہمے پیمءَ کارمرز الّم بیتگ اَنت بلے مہلوک ءِ بزّگی ھلاس نہ بیتگءُ دومی نیمگ ءَ دُنیا گُمان کنَنت کہ نی بلوچستان ءِ بزّگی پہ دائم ھلاس بیت چو کہ اے پورٹ پہ بلوچ ءَ نوکیں اُمیتءِ رُژنے یا بلکیں چین ءُ پاکستان ءِ بلین کلدار ءِ باپارپہ مہلوک ءَ زند ءِ سرجمیں آسراتیاں بیاریت ءُ بہ دَنتءُ بیت کنت کہ باندا روچ اے ہلک ھم دُنیا ءِ ہمگام بہ بیت۔ 

سال ءُ ماہ گوْازان بیتنت، گوادر ءِ آبادی ھم گیشتر بیان بیت، شَہر دیراں تاں رواں بیتءُ کِشک تنک تر بیان بیتنت، بُرز ءُ جَہلیںءُ رنگ رنگیں ماڑی ھم مِک بیاں بیتنت۔پورٹ ءَ اگادگہ کارے کُت نکُت بلے گوادر ءِ زمینانی نیاد آزمانءَ چِست کُت۔

یازدہ سال پد، 2013ءَ چین ءُ پاکستان ءَ یک دگہ معائدہ یے دیم ءَ آؤرت۔ ءُ اے براں پنجاہ ءُ شش بلین ڈالر ءِ پاک چین باپاری راہداری ءِ نام ءَ۔ ایشی ءِ رِدا3,000کلومیڑ ءَ تاں دراجیں مزن دگ، ریل ءُ پائیپلائین ءُ بازیں اینرجی پراجکٹ بلوچستان ءِ تیاب دپی شہر گوادر ءَ گوں چین ءِ صوبہ ژنگجانگ ءَ ہمگرنچ کنننت۔ 

ہمے وھد ءَ یک نیمگے گوادر پورٹ ءُ سی پیک ءَ سرجمیں دنیاءِ دلگوش وتی نیمگ ءَ گوْر جت بلے دومی نیمگ ءَ پہ گوادر ءِ بُنکی مہلوک ءَ وڑے نا وڑے ءَ وھد بیست ءُ یکمی کرن ءِ اوّلی دِھک ءَ اوشتات۔ پہ آہاں ہما دگ، ہما آپ ءِ جیڑہ، ہما بجلی ءِ نہ بئیگ ءُ ہما جانسلامتی ءِ جیڑہ تینگہ ھلاسی ءِ نامءَ نہ گِر اَنت۔نی پہ گوادر ءِ مہلوک ءَ اے زانگ المی انت کہ چی پیم ءَ سی پیک پہ آہاں شرتری یے کاریت بلے اے چیز ءِ زانگ ءَ ھم پیش پہ آہاں اے زانگ المّی اِنت کہ سی پیک یا گوادر پورٹ ءِ سر ءَ کار ءِ ہمرائی ءَ پرچا گوادر ءِ تہ ءَ آپ ءِ جیڑہ ءِ گیش ءُ گیوار ءِ سر ءَ کار کنگ نہ بیتگ یا اگاں بیتگ ھم گُڑا لہتیں بے سر ءُ بے پادیں کار کہ مہلوک ءِ دردءَ ہچ ءَ نہ وارت ءُ گُڈ سر ءَ پدا مہلوک سر کپتگ بزّگی ءُ پہ ھور ءِ دُعا ءَ۔

مرچی مہلوک جیڑیت کہ اگاں انچو ڈالرانی پراجکٹاں گوادر ءِ تُن ھلاس کُت نکت ءُ مرچی ھم آ پیش ءِ پیم ءَ پہ آپ ءِ ترمپے ءَ آزمانءِ دیم ءَ دستاں بُرز کننت ءُ دعا ءُ پریات کننت،گڑا دیمروئی کُجا بئیگ ءَ اِنت؟

مہلوک گُمان کنَت کہ آیا آہانی د مگ’’پورٹ ءِ شہر‘‘ءِ نام ءَ کرزیت؟وھدے کہ گورنمنٹ رپورٹے ءِ رِدا گوادر ءِ تہ ءَ کساس نیم آبادی تنیگہ زانت ءَ زبہر اِنت، تنیگہ مردم پہ مزنیں نادراہی ءَ کراچی ءُ دگہ مزنیں شہراں روگ ءَ مجبور اَنت،تنیگہ ہمک دہ لوگ ءِ تہ ءَ شش لوگ انچین اَنت کہ اُدا مرچی ھم دار ءِ سرءَ آسروک کنگ بیت،ہمک دہ وانگ جاہءِ تہءَ ہشت انچیں وانگ جاہ اَنت کہ آہاں شریں در ءُ دیوار نیست،پہ گیشتریں وانگ ءُ زانگ ءَ نودربربے وس انت کہ تنیگہ کراچی ءُ کوئٹہ ءَ روگ اِش لوٹیت۔ گوادرءِ تہ ءَ تُربت یونیورسٹی ءِ برانچے پچ بئیگ الّم مزنیں گپّے بلے تنیگہ اے یونیورسٹی ءَ نہ وتی جنِد ءِ بلڈنگ اَست ءُ نے کہ گیشتر ڈیپارٹمنٹ۔ اے پیم ما گُشت کنیں کہ گوادر تنیگہ شاہ دربری (یونیورسٹی) وانگ ءُ زانگ ءَ چہ زبہر اِنت۔دومی نیمگ ءَ جاور اِیش اَنت کہ وی آ ئی پی کلچر ءَ گوادرءِ دریا ورد بزّگی ءِ آماچ کُتگ کہ ماہ ءِ تہ ءَ باریں چنچو براں آتیاب ءِ روگ ءَ مکن کنگ بنَت ۔ 

اے پیم ءَ مہلوک گُشئے یک تُرس ءُ بیمے ءِ آماچ اِنت۔بازینے تُرسیت کہ پورٹ ءُ سی پیک گوادرءِ دریا ورداں پہ نانءِ چُنڈے ءِ چمدار کنَت ءُ بازینے تُرسیت کہ لہتیں دِھکاں پد بلوچ گوادر ءِ تہ ءَ نہ گواہیت ءُ اگاں گوادر ءِ تہ ءَ ڈنّی ہمے پیم ءَ آیاں بہ بنت گُڑا باندا روچ بلوچستان ءِ اسمبلی ءِ تہ ءَ بلوچ ءِ جاہ ءَ در قوم ننِدیت۔ دیم ءِ کار ءَ وَ وھد اَت گُشیت بلے مہلوک ءِ ذہن ءِ جُستاں کس داشت نہ کنَت۔ ہمے سبب اِنت کہ دسمبر2016ءَ وھدے کہ گوادر کالج ءِ نودربر پنجاب سر وزیر ءِ چیر چستیں دیوانے بہر بنت گُڑا آ ہانی جُست تہنا پورٹ، سی پیک ءُ گوادر ءُ بلوچستان ءِ مہلوک ءِ بزّگی ءَ گوں ہمگرنچ بنَت۔ 

بلے ہمک رند ءِ پیم ءَ اے براں ھم کَسے گوش ءَ مورے ءَ ھم نہ وارت۔ اے گپ راست اِنت کہ گوادر پورٹ ءُ سی پیک بازیں دیمروئی ءِ پراجکٹ کارانت بلے استیں آئین ءِ رِدا پورٹ ءِ دراہیں باپار ءُ ریونیو بنجاہی سرکار ءِ دستءَ اَنت ءُ سی پیک ءَ گوں ہمگرنچیں گیشتریں پراجیکٹانی کار رودرتکی دگ (Eastern Route)ءِ نیمگ ءَ بنت۔

اے دراہیں تُرس ءُ مہلوک ءِ بزّگی ءِ نیام ءَ سی پیک ءَ راستیں دروشم دئیگ پہ پاکستان ءُ چین ءِ سرکارءَ اژدری جوڑ بیتگ۔ بلے اے میگا پراجکٹانی راستیں سوبمندی ءِ ھساب ءُ کتاب تہنا گوادر ءُ بلوچستان ءِ چاگردی، راجمانی ءُ معاشی دیمرئی ءَ گوں ہمگرنچ اَنت ۔تاں ہما روچ ءَ مہلوک ءِ تُن ءُ گُژن، بزّگی،بے روزگاری ءُ ناونندگی ھلاس نہ بیت،اے دراہیں کار بلوچ ءِ درد ءَ نہ ور اَنت۔